Bisdakplanet.net

Niadtong Hunyo 27-Hulyo 1, didto ko sa Germany ug nagkita na gyod mi sa duha ka bisdak didto, nga sila ni Lily ug Ruby. Didto ko sa ilang Lily nihigda lang ug 2 ka adlaw kay nanglaag mi ni Ruby nga walay tulganay tuyok tibuok Bayern region sa Germany ug sa Austria. Ako gyod ning i-promote ang RED BULL kay gipalitan mi ni Lily ug usa case para amo balonon. Iya pa ming gibalonan ug mga makaon para sa amo byahe ug kan-on, itlog nilaga ug chorizo. Nanimaho lagi ming iti tungod sa usa ka dosenang balon namong itlog. Gapakapaka lang god ng tipaka inig kaon namo sa tren. Kumpleto mig bawon.

Nurnberg, Germany

Pag-abot palang nako sa Pasberg, gisugat nako ni Ruby ug igo lang nakong gibutang ako bag sa iya kotse, dayon sutoy namig laag sa Nurnberg, duol ra sa ilaa, mga 30 minutos ra sa tren. First time pod ni Ruby nga makasakay ug tren sa Germany pero bisag mao patoy pagkakita namo, murag dugay na kaayo mi nagkaila. Pareho mig hilig, ang laag ug di pod mosurender, bisag asa mi lagpot, ok lang sa iyaa. Bilib pod ko sa iya bana kay way problema, bisag asa siya paingon, ok lang sa iya bana, mao nay giingon nga dunay pagsalig iya bana niya ug nako, wa gyod mobalibad, ingon sa iya bana, lakaw kung gusto nimo. Si Lily, di pwede kay naa may bata. Nagkita mi ni Lily pag-abot namog suroy ni Ruby, gabii na, 11pm na ug iya anak nga gwapa nga si Jasmine, sobra ka excited, wa nako lung-i ug interview ug gusto na gani matulog uban nako. Gibira nalang ni Lily kay di man ko niya lung-an ug estorya. Hahhahaahha.

Audi sportscar sa Ingolstadt, Germany

Pagkaugma, nagluto si Lily ug bulad, sus, nanimaho tawon ila balay ug nagbalon mig bulad. Sa among kalaagan, naabot mig Austria by train from Munich. Miagi sa mi sa Ingolstadt, ang lugar sa AUDI CAR FACTORY. Nag-order mig sportscar didto sa Audi, kadto lang baratohon amo gipalit, tag-200,000 euros lang kay nakulangan kog cash. (hambugero baya no?) Dayon, gukod sa train paingon sa Munich. Para maka-save, nipalit mig all day Bayern ticket nga pwede magamit tibuok adlaw sa Bayern nga pwede pa hangtod sa Salzburg, Austria. Didto mi nagabhian, mao nga nakadesider mi nga di sa mi molahos sa Vienna, ang capital sa Austria ug didto nalang mi natulog sa Renaissance Hotel sa Salzburg, sosyal, di ba? Kada adlaw laag, usa ka red bull, mao nay among resistensya.
Renaissance Hotel sa Salzburg, Austria
Pagkaugma sayong buntag, byahe nami paingon sa Vienna, nikuha mig all day Austrian ticket nga magamit sa tibuok Austria, pero di mi kasakay sa fast trains, kadto rang hinayan nga train. Duna mi 5 ka stop-over sa Austria ug kada stop-over, naa lang mi mga usa ka oras nga balhin ug laing tren. Pero wise man mi, amo ng daganon ang syudad nga stop-overan namo ug magpakodak. Kahangoshangos mi inig sakay sa tren kay among gigukod ang sunod nga byahe. Suma total nga byahe gikan Salzburg to Vienna, mga 7 hours ug 30 minutes pero enjoy mi sa lugar nga among naagian, sige lang mig tabi ni Ruby.

Vienna, Austria
Naabot mi sa Vienna, mga 5 pm na, amo nalang gibilin amo bags sa locker, bayad lang, dayon lakaw. Ako man god tawon ang tagabitbit sa backpack ni Ruby kay unsaon man god, kagahi ug ulo, giingnan nako nga mag-trolley siya, di gyod kay ok ra kuno, da, pagdinaganay namo sa tren, nireklamo lagi nga “Loy, bug-at ako backpack”, mao akoy nagbitbit.

Vienna, Austria
Sa among pagsuroy sa Vienna, akong nasuta nga mao nani ang pinakanindot nga syudad sa tibuok Europe nga akong naadtoan. Pagkaanindot nalang gyod sa mga lugar, kada lantaw nimo, mapanganga ka sa arkitektura. Ang nakadaut lang sa Austria ug Germany, kasagaran sa ilang mga batasan, walay maayong PR. Dili friendly kung mangutana ka nila, isog ang tubag. Unta tabangan ka kay di ka tagadiha, bahala ka unsaon nimo pag-adto. Dili sama diri sa UK, nga very friendly ang mga tawo ug ma PR. Tinood bya ni.

Ug sa Vienna, unang nabundak ang camera ni Ruby kay nasobrahan sa kaexcited sa lugar, dayon akoy misunod, nabundak pod ug naguba ang lock sa battery, maayo gani kay wa mabuak. Mao nisurender mi adto ug gabii napod, 10 pm na ug ngitngit na kaayo. Nibalik mi sa train statio ug nangitag tape para ipapilit sa lock sa battery, maayo gani kay naremedyohan ug nagamit pa. Nigikan mi balik sa Salzburg, 1230am, mga 7 hours mi sa Vienna lang ug 4 hours lang ang laag kay gabii na.

tulog ko sa bench

tulog pod si Ruby, gabalokot kay tugnaw kaayo

Salzburg, Austria

Munich, Germany

Regensburg, Germany

ako sa Hohenfels

Lily

Pag-abot namo sa 1st stop-over kay ang next train, after 2 1/2 hours pa, mao nga nanghigda sa mi sa beches sa train station ug pwerteng tugnawa, kami ra didto ug duna pod toy mga hubog nga mga lalaki sa atbang. Naabot mi sa Salzburg, mga 8am na. Deretso dayon ug laag human ug pamahaw ug donner kebab, suroy diri ug didto, pakodak ug wala ug tuo. Ang Salzburg mao ang birthplace ni Mozart. Pagka-1 pm, nisakay mig train balik sa Munich ug pag-abot sa Munich, nisuroy mig mga 2 hours dayon, deretso sa Regensburg, dayon suroy napod ug nangawala pa mi didto ug linakaw, dayon uli, gitagbo mi ni Lily sa Parsberg dayon byahe napod sa kotse, mga 15 minutes lang, Hohenfels na, pagkamingaw sa lugar ug puro bukid imo maagian. Pag-abot sa ila Lily, mao patong pagkita namo sa bana ni Lily nga si James ug nalipay napod si Jasmine pagkakita nako ug wa napod ko niya lung-i ug story parade.

amo panihapon uban ni Lily, Ruby ug Jasmine, ang gakuha ug letrato, bana ni Lily

Pagkaugma, human ug pamahaw, gihatod ko ni Lily sa Parsber train station para makasakay sa ako train paingon sa Frankfurt, about 4 1/2 hours travel, 1 stop in Nurmberg, dayon Nurmberg to Frankfurt by ICE(intercity express), dayon sakay by Lufthansa balik sa Birmingham.

Dako ako pasalamat kang Ruby nga bisag ug naluthan ako mga tudlo ug binira sa iya backpack, iya gyod ko giunongan hangtod nagmalamposon ang amo dinalidaling laag. Ug kang Lily, nga maoy nag-abiabi nako ug nag-atiman sa akong pag-estar sa ilaa.

Akong gihagit ang si kinsa nga makalahutay nakog laag, iisa ang mga tiil kay dunay premyo kung inyo ko mapilde ug mapaluya ug linaagay. Sigurado ko, nga gyoy makasugakod sa ako pagkalaagan ug pagkalagsik kay tungod na sa Red Bull. hhahahaha.